爆谷話你知 — 電影幕後篇:造型設計



演員要演活角色,除咗靠演技之外,仲要有符合故事背景、人物特徵嘅化妝同戲服配合。就好似喺《狄仁傑之神都龍王》入面嘅劉嘉玲同Angelababy咁,細緻精巧嘅妝容就令佢地演出加分!


劉嘉玲飾演嘅武則天,妝容仿照唐朝流行嘅「分梢眉」畫法,先剃走原有眉毛,再畫出向上剔起嘅幼線,突顯女皇霸氣;至於Angelababy飾演嘅花魁,就以纖細上揚嘅眼線勾勒出狹長丹鳳眼,再用朱紅色唇膏描畫出唐朝仕女嘅櫻桃小嘴。現代人睇靚唔靚就見仁見智,但以歷史角度睇,呢兩種妝容就相當貼合唐代女性嘅審美觀念。